O xornal La Voz de Galicia faise eco do catálogo de perfís profesionais elaborado pola Consellería de Educación e a Fundación Empresa Universidade (FEUGA). Este catálogo recolle as trinta profesións do futuro que terán máis impacto nos sectores estratéxicos da nosa comunidade de cara ao ano 2030.

Das trinta profesións, defínense dezaseis roles transversais que estarán presentes en todos os sectores económicos, como por exemplo a economía circular; os materiais avanzados; a Internet das cousas; ou a robótica. As outras catorce profesións son os perfís específicos que precisarán as empresas nos próximos anos. Máis da metade dos perfís profesionais posúen competencias STEAM (Science, Technology, Engineering, Art, Mathematics). Entre elas destacan, especialistas en construcións sustentables e o tratamento avanzado de augas; que son competencias directas das profesións relacionadas coa Enxeñería Civil e que se imparten na Escola Técnica Superior de Enxeñería de Camiños, Canais e Portos da Universidade da Coruña:

• Grao en Tecnoloxía da Enxeñería Civil
• Grao en Obras Públicas

 
A seguinte fase deste estudo pasará por analizar as titulacións actuais en Galicia e adaptalas ao catálogo de profesións ou, de ser necesario, propoñer novas titulacións e especialidades nas universidades galegas. Non se trata de que desaparezan as titulacións actuais, segundo apunta a Conselleira de Educación Carmen Pomar, senón que se adecúen en función das demandas futuras, apostando por estudos máis transversais entre disciplinas.

Fonte: La Voz de Galicia